NAGPUR : इयत्ता बारावी नंतरच्या मान्यता प्राप्त तंत्र शिक्षण तसेच व्यवसाय शिक्षण अभ्यासक्रमाच्या महाविद्यालयामध्ये केंद्रीभूत प्रवेश प्रक्रियेव्दारे प्रवेश घेतलेल्या परंतु शासकीय वसतीगृहामध्ये प्रवेश न मिळालेल्या धनगर समाजातील विद्यार्थ्यांना पंडीत दीनदयाल उपाध्याय स्वयंम [ SWAYAM ] योजनेअंतर्गत भोजन, निवास व इतर शैक्षणिक साहित्य उपलब्ध करुन घेण्यासाठी विद्यार्थ्यांच्या आधार संलग्न बैंक खात्यामध्ये थेट रक्कम वितरण करण्यास मान्यता देण्यात आली आहे. या योजनेसाठी अर्ज करण्याचे आवाहन करण्यात आले आहे.
काही नियम / अटी
विद्यार्थी धनगर समाजातील असावा. इयत्ता बारावीमध्ये किमान ६० टक्के गुण मिळालेले विद्यार्थी या योजनेस पात्र राहतील.
योजनेअंतर्गत लाभ घेण्यासाठी संबंधित विद्यार्थ्यांने इयता १२ वी नंतर मान्यताप्राप्त तंत्र शिक्षण तसेच व्यवसाय शिक्षण अभ्यासक्रमाच्या महाविद्यालयामध्ये केंद्रिभूत (CAP) प्रवेश प्रक्रियेव्दारे प्रवेश घेतलेला असावा.
विद्यार्थ्यांने अर्जासोबत जात वैधता प्रमाणपत्र सादर करणे बंधनकारक राहील. विद्यार्थ्यांच्या पालकाचे उत्पन्न अडीच लाखापेक्षा जास्त नसावे.
विद्यार्थ्यांने प्रवेश घेतलेली शैक्षणिक संस्था ज्या शहराच्या ठिकाणी आहे. अशा शहरातील विद्यार्थी रहिवासी नसावा.
विद्यार्थी हा नागपूर जिल्हयातील महाविद्यालयामध्ये शिक्षण घेणारा असावा.
विद्यार्थ्यास इतर मागास बहुजन कल्याण विभागाच्या, सामाजिक न्याय विभागाच्या, आदिवासी कल्याण विभागाच्या किंवा संबंधित शैक्षणिक संस्थेच्या वसतीगृहामध्ये मोफत प्रवेश मिळालेला नसावा.
READ ALSO
सबसे ज्यादा नशा किसमें होता है ? TAPORI TURAKI
एका विद्यार्थ्यास ५ वर्ष सदर योजनेचा लाभ घेता येईल. सदर योजनंचा लाभ घेण्यासाठी विद्यार्थ्यांचे कमाल वय २८ पेक्षा जास्त नसावे. अभ्यासक्रमाच्या मध्यावधी प्रवेश घेतलेला विद्यार्थी योजनेअंतर्गत लाभास पात्र असेल. शिक्षणात खंड पडलेला विद्यार्थी लाभास पात्र असेल तथापि, सदर विद्यार्थी योजने अंतर्गत निश्चित केलेल्या वयोमर्यादेपेक्षा अधिक वयाचा नसावा. निवड करण्यात आलेला विद्यार्थी संबंधित अभ्यासक्रम पूर्ण होईपर्यत लाभास पात्र राहील. मात्र विद्यार्थ्यास प्रत्येक वर्षी त्या-त्या अभ्यासक्रमाच्या परीक्षेत उत्तीर्ण होणे अनिवार्य राहील.
या योजनेचा लाभ घेण्यासाठी संबंधित विद्यार्थ्यांस ऑफलाईन पध्दतीने संबंधित सहाय्यक संचालक, इतर मागास बहुजन कल्याण, नागपूर यांचेकडे अर्ज करणे अनिवार्य राहील. तरी सदर योजनेकरीता तत्काळ अर्ज सादर करण्यात यावे असे आवाहन सहाय्यक संचालक, इतर मागास बहुजन कल्याण राजेंद्र बुजाडे यांनी केले आहे.
